Thursday, July 13, 2017

Shri Krishnana Nooraru Geethegalu - 359

ಗೋವಿಂದ ಬಾರೊ

ಗೋವಿಂದ ಬಾರೊ ಎನ್ನಾನಂದ ಬಾರೊ
ಗೋಕುಲವೆಂಬೊ ಜಗದಿ ನರರೆಂಬೊ ಗೋವ ಕಾಯ್ವ

ಗರಿಯ ಕಿರೀಟ ನೊಸಲಲಿ ಗಂಧಗೀಟ
ಗಲ್ಲದಿ ಸಂಜೆಯ ಸೂರ್ಯನೋಕುಳಿ ಆಟ
ತುಟಿಯಲಿ ಮಂದಹಾಸ ಸೂಸುವ ತುಂಟಾಟ
ಕರ್ಣದಿ ಮುತ್ತಿನೋಲೆ ಬೆಳಕಿನ ನೋಟ (೧)

ರಾಧೆಭಾಮೆಯ ಸಂಗಿ ರುಕ್ಮಿಣಿ ಸಂಸಾರಿ
ಸುಂದರ ಮಾರಪಿತ ನವನೀತ ಚೋರಿ
ವಸುದೇವ ವಂಶಜ ಮೂಲೋಕ ಸಂಚಾರಿ
ಗತಿ ನೀನೆನುವ ಸುಜನರ ರಹದಾರಿ (೨)

ಶಕಟನ ಸಂಹರಿಸಿ ಪೂತನೆಯ ಉಂಡವನೆ
ಎದ್ದ ಕಾಳಿಂಗನ ಹೆಡೆ ಮೆಟ್ಟಿ ನಿಂದವನೆ
ಕೆಡುಕ ಕಂಸನ ಕೊಂದ ಶ್ರೀನಿವಾಸ ವಿಠಲನೆ
ಐವರ ಸಲುಹಿದಿ ಜಗದ ದೇವರ ದೇವ (೩)

ಗೋವಿಂದ ಬಾರೊ ಎನ್ನಾನಂದ ಬಾರೊ
ಗೋಕುಲವೆಂಬೊ ಜಗದಿ ನರರೆಂಬೊ ಗೋವ ಕಾಯ್ವ

ರಚನೆ: ಎನ್.ಕೃಷ್ಣಮೂರ್ತಿ, ಭದ್ರಾವತಿ / ೧೪.೦೭.೨೦೧೭

1 comment:

  1. 'ನರರೆಂಬೊ ಗೋವ ಕಾಯ್ವ' ವ್ಹಾವ್ ಎಂತಹ ಪ್ರಯೋಗ ಸಾರ್. ವ್ಹಾವ್

    ReplyDelete