Thursday, September 14, 2017

Shri Krishnana Nooraru Geethegalu - 361

ಹರಿನಾಮ ಸ್ಮರಣೆ

ಮಾಡೆಲೊ ನರಮನುಜ ಹರಿನಾಮ ಸ್ಮರಣೆ
ದೊರೆವುದೊ ಇಹದೊಳೆ ಶ್ರೀಪಾದ ಕರುಣೆ

ಆದಿಯೊ ಈ ನಾಮ ಅನಂತ ಹರಿನಾಮ
ಅಂತ್ಯರಹಿತವೊ ಶ್ರೀಹರಿನಾಮ
ದಿವ್ಯವೊ ಈ ನಾಮ ಭವ್ಯವೊ ಹರಿನಾಮ
ನುಡಿಯಲು ಸುಶ್ರಾವ್ಯ ಶ್ರೀಹರಿನಾಮ (೧)

ಶಬರಿಯ ಈ ನಾಮ ಅಹಲ್ಯೆ ಹರಿನಾಮ
ಹನುಮನಿಗೊಲಿದ ಶ್ರೀಹರಿನಾಮ
ಐವರಿಗೀ ನಾಮ ವಿಜಯವೊ ಹರಿನಾಮ
ಸುಧಾಮ ಸ್ನೇಹದ ಶ್ರೀಹರಿನಾಮ (೨)

ಮತ್ಸ್ಯವೊ ಈ ನಾಮ ಕೂರ್ಮವೊ ಹರಿನಾಮ
ವರಾಹ ನರಸಿಂಹ ಶ್ರೀಹರಿನಾಮ
ಶ್ರೀನಿವಾಸ ವಿಠಲನೆಂಬೊ ಎನ್ನ ದೇವನ ನಾಮ
ಯತಿಮುನಿರಾಯರ ಶ್ರೀಹರಿನಾಮ (೩)

ಮಾಡೆಲೊ ನರಮನುಜ ಹರಿನಾಮ ಸ್ಮರಣೆ
ದೊರೆವುದೊ ಇಹದೊಳೆ ಶ್ರೀಪಾದ ಕರುಣೆ

ರಚನೆ: ಎನ್.ಕೃಷ್ಣಮೂರ್ತಿ, ಭದ್ರಾವತಿ / ೧೫.೦೯.೨೦೧೭

Tuesday, August 15, 2017

Shri Krishnana Nooraru Geethegalu - 360

ಮಾರ ಸುಂದರ ಧೀರ ಗಂಭೀರ

ನಂದಕಿಶೋರ ಜಗದೋದ್ಧಾರ
ಮಾರ ಸುಂದರ ಧೀರ ಗಂಭೀರ

ನೊಸಲೊಳು ಚಂದನ ತಿಲಕದಲಂಕಾರ
ಮುಡಿಯೊಳು ಮಯೂರ ಗರಿ ಸಿಂಗಾರ
ನಯನದಿ ನಸುನಗೆ ಮೋಹಕ ಸಂಚಾರ
ಘಲುಘಲು ಘಲುಘಲು ಕಾಲೊಳು ಝೇಂಕಾರ (೧)

ರುಕ್ಮಿಣಿ ಸರದಾರ ರಾಧೆಯ ಮನಸೂರ
ಪಾರಿಜಾತ ಪ್ರಿಯ ಭಾಮೆಗೂ ಚಂದಿರ
ನವನೀತ ಚೋರ ವನಮಾಲಾಧರ
ವೇಣುಗೋಪಾಲ ಒಲವಿನ ಸಾಗರ (೨)

ಪೂತನೆಗೂ ಕುವರ ಶಕಟ ಸಂಹಾರ
ಕಳಿಂಗ ಮರ್ದನ ದೇವಕಿಯುದರ
ಶ್ರೀನಿವಾಸ ವಿಠಲನ ಶ್ರೀಕೃಷ್ಣನವತಾರ
ಯತಿಮಧ್ವರಾಯರು ಪೂಜಿಪ ದೇವರ (೩)

ನಂದಕಿಶೋರ ಜಗದೋದ್ಧಾರ
ಮಾರ ಸುಂದರ ಧೀರ ಗಂಭೀರ

Thursday, July 13, 2017

Shri Krishnana Nooraru Geethegalu - 359

ಗೋವಿಂದ ಬಾರೊ

ಗೋವಿಂದ ಬಾರೊ ಎನ್ನಾನಂದ ಬಾರೊ
ಗೋಕುಲವೆಂಬೊ ಜಗದಿ ನರರೆಂಬೊ ಗೋವ ಕಾಯ್ವ

ಗರಿಯ ಕಿರೀಟ ನೊಸಲಲಿ ಗಂಧಗೀಟ
ಗಲ್ಲದಿ ಸಂಜೆಯ ಸೂರ್ಯನೋಕುಳಿ ಆಟ
ತುಟಿಯಲಿ ಮಂದಹಾಸ ಸೂಸುವ ತುಂಟಾಟ
ಕರ್ಣದಿ ಮುತ್ತಿನೋಲೆ ಬೆಳಕಿನ ನೋಟ (೧)

ರಾಧೆಭಾಮೆಯ ಸಂಗಿ ರುಕ್ಮಿಣಿ ಸಂಸಾರಿ
ಸುಂದರ ಮಾರಪಿತ ನವನೀತ ಚೋರಿ
ವಸುದೇವ ವಂಶಜ ಮೂಲೋಕ ಸಂಚಾರಿ
ಗತಿ ನೀನೆನುವ ಸುಜನರ ರಹದಾರಿ (೨)

ಶಕಟನ ಸಂಹರಿಸಿ ಪೂತನೆಯ ಉಂಡವನೆ
ಎದ್ದ ಕಾಳಿಂಗನ ಹೆಡೆ ಮೆಟ್ಟಿ ನಿಂದವನೆ
ಕೆಡುಕ ಕಂಸನ ಕೊಂದ ಶ್ರೀನಿವಾಸ ವಿಠಲನೆ
ಐವರ ಸಲುಹಿದಿ ಜಗದ ದೇವರ ದೇವ (೩)

ಗೋವಿಂದ ಬಾರೊ ಎನ್ನಾನಂದ ಬಾರೊ
ಗೋಕುಲವೆಂಬೊ ಜಗದಿ ನರರೆಂಬೊ ಗೋವ ಕಾಯ್ವ

ರಚನೆ: ಎನ್.ಕೃಷ್ಣಮೂರ್ತಿ, ಭದ್ರಾವತಿ / ೧೪.೦೭.೨೦೧೭

Tuesday, June 28, 2016

Shri Krishnana Nooraru Geethegalu - 358

ಕರುಣಿಸಿ ಕಾವುದು

ಕರೆತಂದನೆ ಹರಿಯೆ ಕರುಣಿಸಿ ಕಾವುದು
ಪಾಮರನೆನಗೆ ಪಾದಸೇವೆಯನಿತ್ತು

ಅಜಮಿಳನವನು ನಾರಾಯಣ ಎನಲು
ಕಂಭವ ಮುರಿದೆ ಕಂದ ತಾ ಕರೆಯಲು
ಶಿಲೆಗೊದಗಿದನೆ ಶ್ರೀರಾಮಯ್ಯ
ಜಗದೋದ್ಧಾರಕ ಜಾನಕೀರಮಣ (೧)

ಅರಿವಿತ್ತವ ನೀನೆ ಮರೆವಿತ್ತವ ನೀನೆ
ಮದ ಮೋಹ ಮತ್ಸರ ಮಾಯೆಯಿತ್ತವ ನೀನೆ
ಕೋಟೆಬೆಟ್ಟದ ವಾಸ ಶ್ರೀನಿವಾಸ ವಿಠಲನೆ
ತಪ್ಪುಗಳ ಮನ್ನಿಸಿ ನರನೆನ್ನ ಕಾಯೋ (೨)

ಕರೆತಂದನೆ ಹರಿಯೆ ಕರುಣಿಸಿ ಕಾವುದು
ಪಾಮರನೆನಗೆ ಪಾದಸೇವೆಯನಿತ್ತು

ರಚನೆ: ಎನ್.ಕೃಷ್ಣಮೂರ್ತಿ, ಭದ್ರಾವತಿ / ೦೪.೦೭.೨೦೧೬

Shri Krishnana Nooraru Geethegalu - 358

ಕಂಡೆನಾ ಕೃಷ್ಣನ

ಕಂಡೆನಾ ಕೃಷ್ಣನ ಕಂಡೆ ಗೋವಿಂದನ
ಕಂಡೆ ನಂದನ ಕಂದನ ಕಂಡೆ ಅರವಿಂದನ

ರಘುವಂಶಜ ದಶರಥನ ಪ್ರಿಯಸುತನ ಕಂಡೆನಾ
ಸುಚರಿತ ಸುಗುಣಗುಣ ಅಮಿತನ ಕಂಡೆನಾ
ಧರ್ಮ ಕೋದಂಡಧಾರಿ ದುರುಳಸಂಹಾರನ
ಗತಿ ನೀನೆಯೆನಲು ಕಾವ ತಂದೆ ಶ್ರೀರಾಮನ (೧)

ಹಣೆಗೆ ಗಂಧ ತಿಲಕ ಬಳಿದು ನಗುವ ಚೋರನ
ಹೆಡೆಯ ಮೆಟ್ಟಿ ಗಿರಿಯನೆತ್ತಿ ಮೆರೆದ ಧೀರನ
ಕೋಟೆಬೆಟ್ಟದೊಡೆಯನೆಮ್ಮ ಶ್ರೀನಿವಾಸ ವಿಠಲನ
ಮತ್ಸ್ಯ ಕೂರ್ಮ ಸಿಂಹ ದಶದಿ ಧರೆಯ ಪೊರೆದ ದೇವನ (೨)

ಕಂಡೆನಾ ಕೃಷ್ಣನ ಕಂಡೆ ಗೋವಿಂದನ
ಕಂಡೆ ನಂದನ ಕಂದನ ಕಂಡೆ ಅರವಿಂದನ


ರಚನೆ: ಎನ್.ಕೃಷ್ಣಮೂರ್ತಿ, ಭದ್ರಾವತಿ

Friday, November 27, 2015

Shri Krishnana Nooraru Geethegalu - 357

ಇರಬೇಕು ಬಕುತಿ

ಹೂವ್ವಿನೊಳಗಣ ಗಂಧದಂತೆ ಇರಬೇಕು ಬಕುತಿ
ಸೋತು ಸೋತು ಶ್ರೀಪಾದಕೆ ಗೆಲುವುದೇ ಮುಕುತಿ

ಚುಕ್ಕೆಯೊಳಗಣ ಹೊಳಪಿನಂತೆ ಇರಬೇಕು ಬಕುತಿ
ಚಕ್ಕೆಯೊಳಗಣ ಘಮಲಿನಂತೆ ಇರಬೇಕು ಬಕುತಿ
ನೀರಿನೊಳಗಣ ನಾದದಂತೆ ಮೌನದೊಳಗಣ ಮಾತಿನಂತೆ
ಇಲ್ಲದಂತೆಯೇ ಇರಬೇಕು ಅವ ಮೆಚ್ಚುವ ಬಕುತಿ (೧)

ಅನೇಕದೊಳಗಣ ಏಕದಂತೆ ಇರಬೇಕು ಬಕುತಿ
ಅವನೇ ಇವನೇ ಎನ್ನದಂತೆ ಇರಬೇಕು ಬಕುತಿ
ತ್ರೇತೆಯೊಳಗೆ ಶ್ರೀರಾಮ ದ್ವಾಪರದೆ ಕೃಷ್ಣನಾಮ
ಕಲಿಯೊಳಗೆ ಶ್ರೀನಿವಾಸ ವಿಠಲ ಮೆಚ್ಚುವ ಬಕುತಿ (೨)

ಹೂವ್ವಿನೊಳಗಣ ಗಂಧದಂತೆ ಇರಬೇಕು ಬಕುತಿ
ಸೋತು ಸೋತು ಶ್ರೀಪಾದಕೆ ಗೆಲುವುದೇ ಮುಕುತಿ

ರಚನೆ: ಎನ್.ಕೃಷ್ಣಮೂರ್ತಿ, ಭದ್ರಾವತಿ / ೨೮.೧೧.೨೦೧೫

Saturday, September 5, 2015

Shri Krishnana Nooraru Gethegalu - 356

ಕೃಷ್ಣನು ಇವನಮ್ಮ

ತುಂಟಕಣ್ಣಿನ ನೆಂಟನಿವನು ಗೋಕುಲದವನಮ್ಮ
ನಂದಗೋಪನ ಮುದ್ದುಕಂದ ಕೃಷ್ಣನು ಇವನಮ್ಮ

ಕಣ್ಣಿಗೆ ಕಾಡಿಗೆ ಹಣೆಗೆ ತಿಲಕ ಬರೆದ ಮಾರನಮ್ಮ
ಬೆಣ್ಣೆಯ ಮೆಲ್ಲುತ ಮುಗುದೆಯ ಮನವ ಕದಿವ ಚೋರನಮ್ಮ
ಕಟ್ಟಿದ ಮುಡಿಗೆ ಗರಿಯನು ಮುಡಿದ ಶ್ರೀಹರಿ ಇವನಮ್ಮ
ಕೊಳಲನೂದುತ ಜಗವನೆ ಕುಣಿಸಿದ ಮುರಳಿಯು ಅಮ್ಮಮ್ಮಾ (೧)

ಅಸುರ ಶಕಟನ ವಿಕಟವ ಮುರಿದ ಮುಕುಟನು ಇವನಮ್ಮ
ವಿಷದ ಉರುಗನ ಶಿರವನು ಮೆಟ್ಟಿದ ಧೀರನು ಇವನಮ್ಮ
ಸಜ್ಜನ ಪಾಂಡವರೈವರ ಪೊರೆದ ಶ್ಯಾಮನು ಇವನಮ್ಮ
ಶ್ರೀನಿವಾಸ ವಿಠಲ ನಾಮದ ರಾಮನು ಅಮ್ಮಮ್ಮಾ (೨)

ತುಂಟಕಣ್ಣಿನ ನೆಂಟನಿವನು ಗೋಕುಲದವನಮ್ಮ
ನಂದಗೋಪನ ಮುದ್ದುಕಂದ ಕೃಷ್ಣನು ಇವನಮ್ಮ

ರಚನೆ: ಎನ್.ಕೃಷ್ಣಮೂರ್ತಿ, ಭದ್ರಾವತಿ / ೦೪.೦೯.೨೦೧೫