Shri Krishnana Nooraru Geethegalu - 236

ಕಂಡಿರೇನಯ್ಯ ಎಮ್ಮ ಕಂದನ

ಕಂಡಿರೇನಯ್ಯ ಎಮ್ಮ ಕಂದನ
ಕಂದನ ಗೋವಿಂದನ ಗೋಕುಲದ ಅರವಿಂದನ

ಕಟ್ಟು ಮುಡಿಯ ದಿಟ್ಟನ ಮುಡಿಗೆ ಗರಿಯ ಇಟ್ಟನ
ರತ್ನಮುಕುಟವ ತೊಟ್ಟನ ಜಟ್ಟಿಯ ಸಮಮಟ್ಟನ (೧)

ಮೂಚಂದನ ನಾಮನ ಅಧರ ಕೆಂಪಿನ ಶ್ಯಾಮನ
ಪುಟ್ಟಪುಟ್ಟ ಹೆಜ್ಜೆಯಿಟ್ಟು ಗೆಜ್ಜೆ ಸಪ್ಪಳ ಮಾಳ್ಪನ (೨)

ವೇಣುಮುರಳಿಯ ನುಡಿವನ ಭಾಮೆ ಪ್ರೇಮಕು ತುಡಿವನ
ಚೆಲುವ ಗೋಪಗೊಲ್ಲನ ಚೆಲುವೆ ರಾಧೆ ನಲ್ಲನ (೩)

ಮಾವ ಕಂಸನ ಕೊಂದನ ಅಸುರೆಯ ಮೊಲೆವುಂಡನ
ದುರುಳ ಕುರುಜನ ಹರಿದ ಶ್ರೀಪಾದನೆಮ್ಮ ಮಲ್ಲನ (೪)

ತ್ರೇತೆಯೊಳು ಶ್ರೀರಾಮನ ದ್ವಾಪರದ ಶ್ರೀಕೃಷ್ಣನ
ಸೃಷ್ಟಿಯೊಳಗೆ ಸುಜನ ಪೂಜಿಪ ಶ್ರೀನಿವಾಸ ವಿಠಲನ (೫)

ಕಂಡಿರೇನಯ್ಯ ಎಮ್ಮ ಕಂದನ
ಕಂದನ ಗೋವಿಂದನ ಗೋಕುಲದ ಅರವಿಂದನ

        ರಚನೆ: ಎನ್.ಕೃಷ್ಣಮೂರ್ತಿ, ಭದ್ರಾವತಿ / ೨೭.೦೫.೨೦೧೨