ರಾಧೆಯವಳು ನಿಜದಿ ಮುಗುದೆ
ರಾಧೆಯವಳು ನಿಜದಿ ಮುಗುದೆ ಕೃಷ್ಣನಿವನೆ ಚೋರ
ಅರಿಯದವಳ ಹೃದಯ ವನಕೆ ಲಗ್ಗೆಯಿಟ್ಟ ಪೋರ
ಗೋಕುಲದ ತಂಗಾಳಿ ನುಡಿದಿದೆ ಗೋಪಮ್ಮನ ಕಂದನು
ಮಾನಿನಿಯರ ಮನದ ಕದವ ಮೆಲ್ಲಮೆಲ್ಲ ತೆರೆವನೊ
ಮುರಳಿಮೋಹನ ಮದನಮಾಧವ ಚೆಲುವರೊಳಗೆ ಚೆಲ್ವನು
ಮೋಡಿಗಾರ ಮುದ್ದುಕೃಷ್ಣ ರಾಧೆ ನಿದಿರೆ ಕದಿವನೊ (೧)
ಬಲ್ಲೆನಯ್ಯ ಬೆಡಗಿ ಇವಳೊ ಬೃಂದಾವನದ ಚೆಲುವೆಯೊ
ನಸುನಕ್ಕರೆ ಸವಿಸಕ್ಕರೆ ಪೂರ್ಣಚಂದಿರ ವದನೆಯೊ
ಒಲುಮೆ ವೀಣೆಯ ಮೀಟಿ ಕರೆವಳೊ ವಿರಹಗಾನವ ಪಾಡುತ
ಶ್ರೀನಿವಾಸ ವಿಠಲ ಬರುವನೊ ರಾಧೆ ಮಿಲನಕೆ ಓಡುತ (೨)
ರಾಧೆಯವಳು ನಿಜದಿ ಮುಗುದೆ ಕೃಷ್ಣನಿವನೆ ಚೋರ
ಅರಿಯದವಳ ಹೃದಯ ವನಕೆ ಲಗ್ಗೆಯಿಟ್ಟ ಪೋರ
ರಚನೆ:- ಎನ್.ಕೃಷ್ಣಮೂರ್ತಿ, ಭದ್ರಾವತಿ / ೨೫.೧೦.೨೦೧೧
No comments:
Post a Comment