Shri Krishnana Nooraru Geethegalu - 248

ಸಡಗರ

ಸುಂದರ ಶ್ಯಾಮ ಸುಂದರ ರಾಧೆ ವದನವು ಚಂದಿರ
ರಾಧೆ-ಮಾಧವ ಮಿಲನ ಕ್ಷಣವು ಬೃಂದಾವನದೆ ಸಡಗರ

ಕೃಷ್ಣ ನಯನವು ಸಂಜೆಯಾಗಸ ಬಯಕೆ ತಾರೆ ಹೊಳಪು
ರಾಧೆ ನಡುವದು ಬಳುಕೊ ಯಮುನೆ ಆಹಾ ಎಂಥ ಒನಪು (೧)

ಕೃಷ್ಣನೆದೆಯದು ಮತ್ತಿನಶ್ವವೊ ವೇಗೋನ್ಮಾದದೋಟ
ರಾಧೆ ಚೆಲುವದಾ ರಸಿಕನೊಡಲಿಗೆ ಒಲುಮೆ ಬೆರೆತ ಊಟ (೨)

ಕೃಷ್ಣ ಮೈಮನ ಜೀವಕಣಕಣ ಮೋಹ ಮೋಹನ ಗಾನ
ರಾಧೆ ನುಡಿವ ಜೀವವೀಣೆಯು ಹರ್ಷದಲೆಯಲೆ ಯಾನ (೩)

ಕೃಷ್ಣ ಚೆಲುವನು ಚೆಲುವ ಚೋರನು ಶ್ರೀನಿವಾಸ ವಿಠಲ
ದಿನವೂ ಸವಿವನು ಸವಿದು ತಣಿವನು ರಾಧೆ ಪ್ರೇಮದ ಬಟ್ಟಲ(೪)

ಸುಂದರ ಶ್ಯಾಮ ಸುಂದರ ರಾಧೆ ವದನವು ಚಂದಿರ
ರಾಧೆ-ಮಾಧವ ಮಿಲನ ಕ್ಷಣವು ಬೃಂದಾವನದೆ ಸಡಗರ

        ರಚನೆ: ಎನ್.ಕೃಷ್ಣಮೂರ್ತಿ, ಭದ್ರಾವತಿ / ೧೮.೦೭.೨೦೧೨