Shri Krishnana Nooraru Geethegalu - 253

ಯಾರೆ ಆ ಚೆಲುವನಾರೆ

ಯಾರೆ ಆ ಚೆಲುವನಾರೆ ಹೇಳೆ ಗೆಳತಿ ಎನಗೆ
ವೃಂದಾವನದ ನೆರೆಯವಳೆ ಪರಿಚಯವೆ ನಿನಗೆ

ಎನ್ನ ನಯನದಿ ನಗುತ ನಿಲುವ ಸವಿಸಕ್ಕರೆ ನಿದಿರೆ ಕದಿವ
ಬಾರೊ ಎನ್ನ ಸನಿಹವೆನಲು ರೆಪ್ಪೆಕದವ ತೆರೆದೋಡುವ (೧)

ಬಯಕೆ ಕಂಗಳ ಕಣಜವವನು ಒಲುಮೆ ಹೂವಿನ ಹೃದಯನೆ
ಸೆಳೆದು ಎನ್ನನು ಪ್ರೀತಿಸುಳಿಯೊಳು ಒಂಟಿಯಾಗಿಸಿ ಹೋದನೆ (೨)

ಉಲಿದು ಮುರಳಿಯ ಮೋಹರಾಗವ ಪ್ರೇಮವರ್ಷವ ಸುರಿದನೆ
ವಿರಹದಗ್ನಿಯ ಉರಿಸಿ ಎನ್ನೊಳು ತಣಿಸಲಾರದೆ ಹೋದನೆ (೩)

ಬೇಸರವ ಮರೆಯೆ ರಾಧೆ ಅವನು ಗೋಕುಲ ಚೆಲುವನೆ
ಶ್ರೀನಿವಾಸ ವಿಠಲ ಕೃಷ್ಣನೆ ನಿನ್ನ ಪ್ರೇಮಕೆ ಒಲಿವನೆ (೪)

ಯಾರೆ ಆ ಚೆಲುವನಾರೆ ಹೇಳೆ ಗೆಳತಿ ಎನಗೆ
ವೃಂದಾವನದ ನೆರೆಯವಳೆ ಪರಿಚಯವೆ ನಿನಗೆ

        ರಚನೆ: ಎನ್.ಕೃಷ್ಣಮೂರ್ತಿ, ಭದ್ರಾವತಿ / ೨೩.೦೭.೨೦೧೨