Shri Krishnana Nooraru Geethegalu - 256

ಕಾಯುತಿಹೆನು ಹೇಳೆ ಸಖಿ

ಗೋಕುಲದಾ ಚೆಲುವ ಕೃಷ್ಣ ಎನ್ನ ಗೆಳೆಯನೆ
ಕಾಯುತಿಹೆನು ಹೇಳೆ ಸಖಿ ಎಂದು ಬರುವನೆ ಅವ

ಸುಮ್ಮನಿದ್ದ ಎನ್ನ ಎದೆಗೆ ಸುಮಬಾಣವ ಹೂಡಿದ
ಸನಿಹ ಕರೆದು ಅಧರಗಳಲಿ ಅಕ್ಕರೆಯನು ಬರೆದ
ಮುಂಜುಹನಿ ಮುಸುಕಿದೆನ್ನ ಮೊಗ್ಗಿನಂಥ ಹೃದಯದಿ
ಒಲುಮೆಹೂವ್ವ ವರ್ಣ ಚೆಲ್ಲಿ ಚಿತ್ತಾರವ ಬಿಡಿಸಿದ (೧)

ನಿದಿರೆ ಕಸಿದ ಕನಸ ಹೊಸೆದ ಬಯಕೆ ಚಾದರ ಹೊದಿಸಿದ
ಕೊಳಲನೂದಿ ನಲುಮೆರಾಗವೆನ್ನ ಮೈಮನ ತುಂಬಿದ
ನಡುವ ಬಳಸಿದ ಜಗವ ಮರೆಸಿದ ಪ್ರಾಣವೆನ್ನ ಲೋಲ
ಬರುವನೆಂದೇ ಬೃಂದಾವನಕೆ ಶ್ರೀನಿವಾಸ ವಿಠಲ (೨)

ಗೋಕುಲದಾ ಚೆಲುವ ಕೃಷ್ಣ ಎನ್ನ ಗೆಳೆಯನೆ
ಕಾಯುತಿಹೆನು ಹೇಳೆ ಸಖಿ ಎಂದು ಬರುವನೆ ಅವ

        ರಚನೆ: ಎನ್.ಕೃಷ್ಣಮೂರ್ತಿ, ಭದ್ರಾವತಿ / ೨೬.೦೭.೨೦೧೨