Shri Krishnana Nooraru Geethegalu - 300

ಅವುದೊ ಮೋಹವದು

ಅವುದೊ ಮೋಹವದು ಸೆಳೆಯುತಿದೆ ಎನ್ನನು ಆ ಮುರಳಿಯ ಕರೆಗೆ
ಒಲುಮೆಯ ದಾಹವಿದೆ ಪೋಗುವೆನು ಗೆಳತಿಯೆ ಅವನೆದೆಯಾಸರೆಗೆ

ತೀಡುವ ತಂಗಾಳಿ ಅವ ಬರುವ ಕಚಗುಳಿಯ ಇಡುತಿಹುದೆ ಮೈಯ್ಯ ಒಳಗೆ
ವಿರಹದ ವೀಣೆಯದು ಮೋಹದ ಸರಿಗಮವ ನುಡಿಯುತಿದೆ ಎದೆಯ ಒಳಗೆ (೧)

ಮನಬನದ ಮಾಮರದಿ ಹಾಡುತಿದೆ ಕೋಕಿಲವು ನಲುಮೆಯ ಹೊಸತು ಕಾವ್ಯ
ಅವನೆದೆಯ ಅಪ್ಪುಗೆಯ ಬೆಚ್ಚನೆಯ ಬಂಧನದಿ ಈ ರಾಧೆ ಒಲವೆ ರಮ್ಯ (೨)

ಪ್ರೀತಿಮೋಡದ ಒಡೆಯ ಶ್ರೀನಿವಾಸ ವಿಠಲನೆ ಸುರಿವನು ಸ್ವಾತಿಯ ವರ್ಷವಾಗಿ
ಚಿಗುರಾಗಿ ಹಸಿರಾಗಿ ಗೊನೆಯಾಗಿ ತೆನೆಯಾಗಿ ನಲಿವನೆ ಎನ್ನೊಳಗ ದಾಹ ನೀಗಿ (೩)

ಅವುದೊ ಮೋಹವದು ಸೆಳೆಯುತಿದೆ ಎನ್ನನು ಆ ಮುರಳಿಯ ಕರೆಗೆ
ಒಲುಮೆಯ ದಾಹವಿದೆ ಪೋಗುವೆನು ಗೆಳತಿಯೆ ಅವನೆದೆಯಾಸರೆಗೆ

    ರಚನೆ: ಎನ್.ಕೃಷ್ಣಮೂರ್ತಿ, ಭದ್ರಾವತಿ / ೩೦.೦೯.೨೦೧೨