Shri Krishnana Nooraru Geethegalu - 266

ಕುಣಿದು ಬಾ ಕೃಷ್ಣ

ಥಕಧಿಮಿತ ಥಕಧಿಮಿತ ಕುಣಿದು ಬಾರೊ ಕೃಷ್ಣ
ಕೊಳಲೂದುತ ಕಿರುನಗೆಯೊಳು ನಲಿದು ಬಾರೊ ಕೃಷ್ಣ

ಮಥುರೆಯ ಸೆರೆಯಿಂದ ಯಮುನೆಯ ನಡೆ ತಡೆದು
ಗೋವಿಂದ ಗೋಕುಲಕೆ ನೀನೊಲಿದು ಬಾರೊ
ಕಳೆಯೊ ಕಂಸನ ನಿಶೆಯ ತೋರೊ ಸುಜನಗೆ ಉಷೆಯ
ಕಾಳಿಂದಿ ಮದದೆಡೆಯ ನೀ ತುಳಿದು ಬಾರೊ (೧)

ಮೂಲೋಕದೊಡೆಯನೆ ಮೂಲರಾಮನೆ ಕೃಷ್ಣ
ಜಗದೋದ್ಧಾರಕನೆ ಜಯತು ನೀ ಬಾರೊ
ಧರ್ಮದಾ ಪಾಂಡವರ ಧರಣಿಯೊಳು ಸಲಹಿದನೆ
ದ್ವಾರಕಾಧೀಶನೆ ಜಯತು ನೀ ಬಾರೊ (೨)

ನೊರಹಾಲ ನಿನಗಿಡುವೆ ಸವಿದು ಸಲಹೊ ಎನ್ನ
ನವನೀತಚೋರನೆ ನಗುನಗುತ ಬಾರೊ
ಮುದ್ದುರಾಧೆಯ ಪ್ರಿಯನೆ ಶ್ರೀನಿವಾಸ ವಿಠಲಯ್ಯ
ಅವಳೊಲವ ಒಂದಣುವ ಎನಗೆ ನೀ ತೋರೊ (೩)

ಥಕಧಿಮಿತ ಥಕಧಿಮಿತ ಕುಣಿದು ಬಾರೊ ಕೃಷ್ಣ
ಕೊಳಲೂದುತ ಕಿರುನಗೆಯೊಳು ನಲಿದು ಬಾರೊ ಕೃಷ್ಣ

        ರಚನೆ: ಎನ್.ಕೃಷ್ಣಮೂರ್ತಿ, ಭದ್ರಾವತಿ / ೦೮.೦೮.೨೦೧೨