Shri Krishnana Nooraru Geethegalu - 268

ಕ್ಷಣವೊಂದು ಯುಗ

ಕ್ಷಣವೊಂದು ಯುಗವಹುದು ನಿನ್ನಗಲಿಕೆಯು ಕೃಷ್ಣ
ಸಂಭ್ರಮದ ಸನಿಹದೊಳು ಯುಗವೆ ಕ್ಷಣವು

ನೀನಿರದ ಇರುವಿನೊಳು ನಾನು ನಾನಲ್ಲವೊ
ನಯನದೊಳು ನೋಟವದೆ ಇಲ್ಲದಂತೆ
ಇರುಳಿನೊಳು ಬರಿಬಾನು ಸೊಬಗೇನೊ ಶ್ರೀಕೃಷ್ಣ
ನಿನ್ನಾತ್ಮವಿರದೆನ್ನ ದೇಹದಂತೆ (೧)

ಎನ್ನೆದೆಯ ಸರಿಗಮವ ನುಡಿಸೊ ನಿನ್ನೆದೆ ಮುರಳಿ
ಮೌನವಿದೆ ರಾಗವೇ ತಿಳಿಯದಂತೆ
ಬೀಸುತಿಹ ತಂಗಾಳಿ ಸುದ್ದಿ ತಂದಿತೆ ಕೃಷ್ಣ
ಹೇಳೆಂದೆ ರಾಧೆಗೆ ನಿನದೆ ಚಿಂತೆ (೨)

ಬಾರೆನ್ನ ನೇಸರನೆ ಬೇಸರವು ಎನ್ನೊಳಗೆ
ಕಮಲದಂದದಿ ಕಾಯ್ವೆ ಕ್ಷಣವು ನಿನ್ನ
ಶ್ರೀನಿವಾಸ ವಿಠಲನೆ ಗೋಕುಲದ ಕೃಷ್ಣಯ್ಯ
ನಿನ್ನ ಒಲವಿನಯೆದೆಯು ಒರಗೆ ಚೆನ್ನ (೩)

ಕ್ಷಣವೊಂದು ಯುಗವಹುದು ನಿನ್ನಗಲಿಕೆಯು ಕೃಷ್ಣ
ಸಂಭ್ರಮದ ಸನಿಹದೊಳು ಯುಗವೆ ಕ್ಷಣವು

        ರಚನೆ: ಎನ್.ಕೃಷ್ಣಮೂರ್ತಿ, ಭದ್ರಾವತಿ / ೧೧.೦೮.೨೦೧೨