Shri Krishnana Nooraru Geethegalu - 272

ಏನ ಬೇಡಲೊ ದೇವ

ಏನ ಬೇಡಲೊ ದೇವ ನಿನ್ನೊಳು ಕರಮುಗಿದು
ಆ ನಿನ್ನ ಶ್ರೀಚರಣ ಸನಿಹ ಸುಖವಲ್ಲದೇ

ಅರಸುತನ ಬೇಡೆನಗೆ ಹರಸುವವ ನೀನಿರಲು
ಅಳಿಸಿ ಪೋದನು ಅಬ್ಬರಿಸಿದಾ ಕುರುಜನು
ಅವನಿ ಐಶ್ವರ್ಯವದ ಹಂಬಲಿಸಿದಸುರನ
ಶಿರಮೆಟ್ಟಿ ಸುತಳದೊಳು ಸಲಹಿದನೆ ಕೃಷ್ಣ (೧)

ಪರಮೋಹವಿಲ್ಲೆನಗೆ ಪರಮಪುಣ್ಯನೆ ಕೃಷ್ಣ
ಸುಧಾಮನಂದದೊಳು ಸಖ್ಯವಿರಿಸೊ
ಶಬರಿಯಂದದಿ ಕಾಯ್ವೆ ಜನುಮಜನುಮಗಳಲ್ಲಿ
ಶ್ರೀರಾಮಮೂರುತಿಯೆ ನೀ ಕರುಣಿಸೊ (೨)

ಧನಕನಕ ಬೇಡೆನಗೆ ಧನಿಕ ಎನ್ನವ ನೀನೊ
ವೈಕುಂಠಪುರದೊಡೆಯ ಲಕುಮಿಲೋಲ
ದಿವ್ಯದಾ ಚರಣಗಳೆ ಸಕಲ ಸಂಪದ ಎನಗೆ
ಮತ್ತೆಲ್ಲ ಕ್ಷಣಿಕವೊ ಶ್ರೀನಿವಾಸ ವಿಠಲ (೩)

ಏನ ಬೇಡಲೊ ದೇವ ನಿನ್ನೊಳು ಕರಮುಗಿದು
ಆ ನಿನ್ನ ಶ್ರೀಚರಣ ಸನಿಹ ಸುಖವಲ್ಲದೇ

        ರಚನೆ: ಎನ್.ಕೃಷ್ಣಮೂರ್ತಿ, ಭದ್ರಾವತಿ / ೧೯.೦೮.೨೦೧೨