Shri Krishnana Nooraru Geethegalu - 112

ಹರಿ ನೀನು

ಹರಿ ನೀನು ಹಗಲಯ್ಯ ಎನ್ನಿರುಳಿನೊಳಗಿಗೆ
ಅರಿವಿನಣತೆಯ ಬೆಳಗೊ ಆದಿದೇವ

ಹರಿ ನೀನು ಮಾಮರವು ನಾ ನಿನ್ನ ಕೋಕಿಲವೊ
ದಿವ್ಯನಾಮವ ನುಡಿಸೊ ದೇವದೇವ

ಹರಿ ನೀನು ಹಸಿರಯ್ಯ ಕೊನರದ ಕೊರಡೊ ನಾ
ಚಿಗುರ ಚಿತ್ರವ ಬಿಡಿಸೊ ವಾಸುದೇವ

ಹರಿ ನೀನು ಹರಿವ ನದಿ ನಾ ಬರಿಯ ಪಾತ್ರವೊ
ಒರತೆ ಇಂಗದೆ ಸಲಹೊ ದೇವದೇವ

ಹರಿ ನೀನು ದೀಪ್ತಿಯೊ ನಾನುರಿವ ದೀಪವೊ
ಉಣಿಸಿ ತೈಲವ ಪೊರೆಯೊ ಶ್ಯಾಮದೇವ

ಹರಿ ನೀನು ಧರೆ ಕಾಯ್ವ ಶ್ರೀನಿವಾಸ ವಿಠಲನೊ
ಸುಜನರಾತ್ಮದಿ ನೆಲೆಸೊ ದೇವದೇವ

ರಚನೆ:- ಎನ್.ಕೃಷ್ಣಮೂರ್ತಿ, ಭದ್ರಾವತಿ / ೨೩.೦೫.೨೦೧೧