Shri Krishnana Nooraru Geethegalu - 052

ಭೃಂಗವಾಗಿಸೊ ಎನ್ನ

ಭೃಂಗವಾಗಿಸೊ ಎನ್ನ ಸಂಗ-ಶೃಂಗದಿ ನಿನ್ನ
ಶ್ರೀಪಾದಪುಷ್ಪದ ಮುಕುತಿಮಧುವನು ನೀಡಿ

ಅದುವು ಅಹುದೆಂದು ಇದು ಅಹುದಹುದೆಂದು
ರುಚಿರುಚಿಯೊಳಿದುವೆ ಸವಿಯ ರುಚಿಯೆಂದು
ಸಾರವಿಲ್ಲದೀ ಹೂವ್ವ ನಿಸ್ಸಾರವುಂಡೆನೊ ದೇವ
ನಿನ್ನ ಸುಸ್ಸಾರ ನಾಮದಮೃತವು ಸಿಗದೆ (೧)

ಸನಾತನ ಶ್ರೀಹರಿಯೆ ಚಿರನೂತನ ನರಹರಿಯೆ
ಆದಿ ಅನಂತ ಅಂತ್ಯವರಿಯದ ದೊರೆಯೆ
ಬರಿದಾಗದಕ್ಷಯ ನಿನ್ನ ಶ್ರೀನಾಮದಾ ಬಟ್ಟಲ
ಮಧುವ ಎನಗಿತ್ತು ಸಲಹೊ ಶ್ರೀನಿವಾಸ ವಿಠಲ (೨)

ಭೃಂಗವಾಗಿಸೊ ಎನ್ನ ಸಂಗ-ಶೃಂಗದಿ ನಿನ್ನ
ಶ್ರೀಪಾದಪುಷ್ಪದ ಮುಕುತಿಮಧುವನು ನೀಡಿ

ರಚನೆ:- ಎನ್.ಕೃಷ್ಣಮೂರ್ತಿ, ಭದ್ರಾವತಿ / ೧೯.೦೧.೨೦೧೧